Платформата ТЕРАПИЈА чија цел е креирање на простор за равој на независна културна и клупска сцена, се пушта во употреба денес на www.terapija.mk.

Македонија отсекогаш имала вибрантна клупска сцена која била на рамниште со сцените во регионот и Европа. Клубовите беа витални места на поврзување, ослободување и задоволства. Пандемијата физички не‘ одалечи, но виртуелниот простор има потенцијал да ги надминува овие предизвици.

Ние, креаторите на платформата ТЕРАПИЈА силно веруваме дека истата енергија може да се постигне доколку се вложи во промена и адаптирање на новата ситуација. ТЕРАПИЈА е место на кое ќе се поврзуваме едни со други со цел заживување и развој на електронската музичка заедница. Ги насочивме нашите погледи кон иднината додека ги негуваме корените во минатото за да ги споиме новите технологии со уметноста, да ги активираме нашите тела и критички го ангажираме умот. ТЕРАПИЈА ве повикува на колективно дејствување со цел спас на нашата сцена.

Креаторка на проектот е Тренчева Слободанка Боте, која подетално објасни што претставува терапија и која е целта на овој проект:

„Светската музичка култура се соочува со најголемиот предизвик во својата историја. Пандемијата и кризната состојба предизвикана од Ковид-19 влијаеше драстично врз културниот, социјален и ноќен живот во светот, а и во нашата земја. Од март, ноќниот живот кај нас беше официјално затворен и оттогаш, сите сме свесни, дека повеќе ништо не е исто како порано.
Дури и кога зборуваме за попуштање на рестриктивните мерки, не зборуваме за враќање на истите начини на културен и ноќен живот на кои бевме навикнати и кои подразбираа големи и робусни јавни собири. Ова значеше дека голем број вработени уметници одеднаш се најдоа без работа и многу места, клубови, фестивали, клупски вечери и забави што се дел од идентитетот на Македонија и Скопје се на работ на пропаст. Повеќето од нив не добиваат поддршка од владата која ќе значи не само спас туку и одржување на една значајна културна сцена. Дополнително, дигиталниот развој на нашата култура оди многу бавно, а јас мислам дека имаме потенцијал похрабро да зачекориме по тој пат.

Со оваа музичка платформа нашата цел е да се поддржуваме едни со други, да го преиспитаме синџирот на вредности и да изнајдеме решенија, бидејќи во иднина можат да се појават повеќе предизвици како што е моменталната ситуација со пандемијата. Ве повикуваме на колективно дејствување на електронската музичка заедница.“

Куќни правила: Расизмот, хомофобијата, трансфобијата и сексизмот не се прифатливи во нашите клубови и нема да бидат толерирани како дел од ова заедничко виртуелно дружење. Почитта кон другиот е наш врвен императив, а говорот на омраза, малтретирањето и вознемирувањето се најстрого забранети.