STAR оваа година по 14 пат организира Марш на Црвениот Чадор по повод глобалното одбележување на 17-ти декември, Меѓународниот ден за СТОП на насилството врз сексуалните работнички/ци. Кажете ни нешто повеќе за маршот кој го организирате традиционално.

Како и секоја година, така и оваа, ние, сексуалните работници, здружени во СТАР- Првиот колектив на сексуални работници на Балканот, и нашите поддржувачи ХОПС-Опции за здрав живот Скопје и Коалиција МАРГИНИ, се приклучуваме кон глобалното одбележување на 17-ти декември, Меѓународниот ден за СТОП на насилството врз сексуалните работници, и по тој повод ќе го организираме по четирнаесети пат традиционалниот Марш на црвените чадори.

Маршот, ќе се одржи во Скопје на 17.12.2021 (петок), и ќе започне во 12 часот, од пред платото на спомен куќата на Мајка Тереза на ул. Македонија и ќе заврши на плоштад „Филип II“. Пред започнување на маршот, сексуални работници ќе дадат изјави за медиумите.
Со овогодинешната кампања, повторно ќе ставиме акцент на потребата од декриминализација на сексуалната работа како најдобра правна рамка за унапредување на човековите, работничките и здравствените права на сексуалните работници, како и итноста од донесување нова правна рамка за регулација на сексуалната работа во Република Северна Македонија.

Зошто е важно излегувањето во јавниот простор за сексуалните работнички и работници и за вас, како организација?

Како организација предводена од сексуални работници која повеќе од 10 години се залага за заштита и унапредување на правата на сексуалните работници во социјалниот, правниот и здравствениот систем, и ја промовира сексуалната работа во општеството како и секоја друга професија, сметаме дека излегувањето во јавноста и зголемувањето на видливоста е од големо значење за постигнување на нашите цели како заедница која се уште живее на маргините во нашата земја.

Преку јавни настани, кампањи како што е Маршот на црвените чадори и Скопје Ред Лајт Дистрикт, ние секуалните работници, ги промовираме нашите аспирации, ги застапуваме нашите права, и зборуваме во наше име. Само со кревање на гласот на сексуалните работници и јавното говорење можеме да го добиеме она што ни е најмногу потребно како заедница – да живееме и да работиме во безбедни услови, со еднакви права како и сите други граѓани, со адекватен и лесен пристап до здравствени, социјални и правни услуги.

Долго време се залагате за декриминализација на сексуалната работа во Македонија. Зошто е потребно час поскоро да се донесе соодветна законска рамка?

Процесот за барање на декриминализација на сексуалната работа е веќе опточнат. Ние во СТАР, заедно со ХОПС и МАРГИНИ, веќе поднесовме предлог иницијатива во име на неформалната Платформа за декриминализација на сексуалната работа, до надлежните органи за измени на веќе постоечките закони кои ги таргетираат сексуалните работници во нашата земја, односно Кривичниот законик (Член 191) и Законот за прекршоци против јавен ред и мир (Член 19), по кои се казнуваат одредени активности поврзани со сексуалната работа. Последователно, како одговор кон доставената предлог иницијатива, од Министерството за правда како надлежен орган за измени на Кривичниот закон нè информираа дека постапката за декриминализација на сексуалната работа треба да започне од Законот за прекршоци против јавен ред и мир, кој е под надлежност на Министерството за внатрешни работи. Меѓутоа, не застануваме тука, продолжуваме понатаму да го водиме процесот, со цел што е можно поскоро да се донесе правна рамка за регулација на сексуалната работа преку измени и дополнување на постоечките закони и пишување на нови.

Сметаме декриминализацијата на сексуалната работа како најдобра правна рамка за регулација, ќе придонесе за намалување на насилството врз заедницата на сексуални работници, особено родово базираното насилство, намалување на стигмата и дискриминацијата која е присутна секојдневно во нашите животи, ќе не охрабри да пријавуваме насилство, и ќе овозможи заштита на нашите човекови и работнички права.

Сексуалните работници се едни од најпогодените групи граѓани во пандемијата, но не беа опфатени преку владините мерки за помош. Дали ситуацијата е сè уште слична и каде го гледате излезот од истата?

КОВИД-19 пандемијата придонесе кон зголемување на многубројните здравствени и социјални нееднаквости помеѓу ранливите популации како што се сексуалните работници. Ние, како маргинализирана група на граѓани се соочивме и сè уште со соочуваме со низа проблеми и потешкотии бидејќи сме исклучени од владините мерки за помош и заштита од КОВИД-19. Пандемијата влијае негативно врза нашата општа благосостојба, меѓусебната интеракција, финансиските средства, основните средства за живот, како што се домување, храна, и сл. Дополнително, постоечките законски казни, политики и воспоставената пракса на непризнавање на сексуалната работа како работна дејност, не само што во услови на здравствена криза ја онеспособуваат нашата економската моќ, туку и jа зголемуваат нашата ранливост на КОВИД-19. Во услови кога сексуалната работа не е конкретно правно регулирана и признаена како дејност, ние како маргинализирана заедница не сме во можност да ги користиме економските мерки кои важат за останатите граѓани, и не можеме да работиме во здравствено контролирани околности кои овозможуваат заштита и придонесуваат кон спречување на ширење на пандемијата.

Секако, излезот го гледаме во донесување на соодветен модел за регулација на сексуалната работа која ќе придонесе до признавање на нашата професија и препознавање на нашиот труд, со заштитата на нашите права преку законите за работни односи и со регулација за безбедноста и здравјето на работното место.

За крај, што би им препорачале на читателите кои имаат одредени задршки или предрасуди кон сексуалните работници?

Дискриминацијата и предрасудите од страна на општеството уште повеќе придонесуваат кон продлабочување на проблемите со кои ние се соочуваме како ранлива категорија на граѓани. Затоа ни е многу важно да ја добиеме поддршката од јавноста во борбата за ставање крај на насилството, експлоатацијата и во обидите да обезбедиме безбедни услови за живот и работа за сите.

За крај, ги повикуваме сите кои сакаат да ни се придружат овој петок на Маршот на црвените чадори по повод одбележувањето на 17ти декември, Меѓународниот ден за стоп на насилството врз сексуалните работници, за заедно да испратиме порака до јавноста за итноста од донесување на соодветен модел за регулација на сексуалната работа во Република Северна Македонија.