,

Every body is a beach body

Заеби кој што ќе каже или како ќе те погледне. 40 степени е, облечи бикини, шорцеви или кратко фустанче, ок е.

maja_pool

Летото е период кој едвај го чекаме цела година, но постои една голема група на жени, како и мажи, за кои летото е тотален кошмар. Зошто? Затоа што и на 40 степени тие се движат во долги панталони и облека што покрива што е можно поголем дел од телото. Многу луѓе не се чувствуваат удобно да облечат шорцеви или маица по прерамки, а да не зборуваме за костим за капење. 

Јас бев една од тие девојки кои се срамат да облечат кратко во сред лето затоа што моите бутови не изгледаа онака како што модната индустрија налага дека треба да изгледаат, се вриев на 40 степени во долги фармерки за луѓето да не ми се смеат и гледаат чудно. Носев широки, големи маици за да не ми се гледаат „свадбарките“ и за да си го скријам стомакот. Одењето на плажа беше приказна сама за себе. Обавезно носев едноделни купаќи, бидејќи никако не смее да се види стомак на плажа,а обавезно мора одозгора некоја наметка или маица!  Наметката се соблекуваше само по потреба, пред да влезам во вода, па од вода во пешкир, од пешкир во наметка и така до залез. Имав смислено цела стратегија на движење, само за да можам барем малку да уживам во летото. Мислев дека само толку заслужувам заради телото кое го имам, кое што не се совпаѓа со совршениот beach body изглед кој се пропагираше во медиумите и списанијата, кои агресивно комуницираа “Како до совршениот изглед за на плажа за само 7 дена“. Можам да се сетам како жално гледав други девојки на плажа и бев љубоморна. Многу љубоморна! Кога ќе видев некоја девојка со барем неколку килограми помалку од мене си мислев “Ех, само да изгледав како неа, поинакви ќе беа работите, ќе имав повеќе самодоверба“. Од денешна перспектива, прилично сум сигурна дека сум го викала истото и за девојки кои изгледаат исто како мене, бидејќи во мојата глава јас изгледав различно отколку во реалноста. Кога ќе видев безгрижна девојка која изгледа како мене на плажа си велев „Браво, колку е храбра!“. Во која просторија и да влезев, на која плажа и да се појавев, си мислев дека сите други изгледаат подобро од мене. Се грижев за се, освен за себе, додека не сфатив дека секоја личност има право да ужива без разлика како изгледа. Тоа што некој си го живее животот како што сака во никој случај не треба да се смета за храброст и нешто невообичаено, туку треба да биде најсекојдневно и нормално нешто. Во последно време добивам доста пораки на Инстаграм во кои и мене ме нарекуваат храбра, ми велат браво и бараат совети како да се здобијат со повеќе самодоверба. Но, работите за мене не беа од секогаш како што се сега. Како девојка која не сакаше да се појави на плажа во купачи, а сега гордо постира разголени слики пред илјадници следбеници на Инстаграм, еве неколку совети како да престанете да се замарате и да почнете да уживате во летото: 

 

Модната индустрија не е репер 

 

Се откажуваме од многу работи и не живееме слободно, само затоа што изгледаме на одреден начин. Запомнете едно нешто: ваквите мисли не се наши мисли, туку се општествно наметнати, особено од страна на модната, фитнес индустријата и индустријата за убавина, кои постојано ни налагаат стандарди на убавина кои ги претвораат нашите несигурности во профит. Работите се менуваат кога ќе ќе почнеме да ги преиспитуваме овие идели и ќе застанеме на свои нозе. 

 

 

Illustration: Maja Tomljanovic

 

 

Различностите се убави 

 

Кога ќе отидеме на плажа, без разлика како изгледаме, сонцето сите не’ грее исто, кога ќе згазнеме на жешкиот песок на сите ни е жешко, кога ќе ги потопиме нозете во вода сите го чувствуваме истотото чувство на свежина, кога е 40 степени, за сите е 40 степени еднакво. Тогаш зошто некој да смее да носи помалку облека, а некој повеќе? Тргнете го погледот од Инстаграм, од рекламите, списанијата и погледнете наоколу. Забележете ги луѓето околу вас, забележете колку се сите различни, колку различни форми на тело постојат… Замислете колку би бил досаден светот ако сите изгледавме исто, ако се однесувавме исто,  ако сите не’ интересираа исти работи… 

 

Привлечност наспроти почит

 

Кога некој не’ суди заради изгледот, тоа кажува многу повеќе за таа личност отколку за нас. Прво, дека и тие се жртви на капитализмот, односно слепо го следат она што го налага ингустријата. Второ, дека  тие луѓе немаат добро домашно воспитание. Трето, веројатно нашиот живот им е поинтересен од нивниот, па затоа се замараат со нашиот наместо со својот… Сите сме различни и нормално е на сите да ни се привлечни различни физички карактеристики, но многу често луѓето ги мешаат физичката привлечност и почитта. Не мора да сметаш дека некој е привлечен, за да бидеш културен и да го почитуваш. Нормално е да не сум му физички привлечна на секој човек, нормално е и мене да не ми е физички привлечен секој човек, но тоа не дава за право да навредувам и намерно да сакам да направам некој да се чувствува лошо! На крајот од денот, ние не постоиме, не се облекуваме или разголуваме за да задоволуваме други, туку за да бидеме задоволни со себеси.  

 

 

Illustration: Maja Tomljanovic

 

Опкружете се со позитивност

 

 

Семејството и луѓето со кои се дружиме најчесто најмногу влијаат на нашите размислувања. Какво ти влијаат луѓето околу тебе? Позитивно или негативно? Ако е негативно, време е за промени. Ок е да се оддалечиш од луѓето кои имаат токсично влијание врз тебе. Освен луѓето околу нас, огромно влијание на тоа како размислуваме и кои вредности ги цениме доаѓаат од социјалните медиуми. Често знаеме да се пожалиме колку социјалните медиуми имаат негативно влијание на нас, но она што го забораваме е дека ние сме тие кои одлучуваме што ќе следиме. На инстаграм има профили на секоја можна тема што може да се замисли, така што, од нас зависи како ќе се чувствуваме кога ќе ја затвориме апликацијата после саат време скролање: инспирирано или разочарано. Отследете ги сите профили кои прават да се чувствувате полошо и заследете позитивни профили за вас. Отследете ги Кардашијанс и компанија и заследете уметници, активисти, дизајнери, инспиративни профили, боди позитивити профили… Наполнете го вашиот инстаграм со позитива и чувствувајте се убаво секогаш кога ќе ја отворите апликацијата.

 

 

Кои се вашите вредности?

 

 

Кои се вредностите кои ги цените кај другите луѓе? Дали ги дефинирате луѓето според нивниот изглед или поважно ви е личноста да има добра душа, да е паметна, хумана, да ве почитува, да можете да и верувате, да е тука за вас и слично….? Има толку многу работи кои се поважни од изгледот, а сепак му даваме премногу значење и дозволуваме да раководи со одредени аспекти од нашите животи. Изгледот е само еден мал дел од тоа кои сме и колку вредиме!

Погледнете ја големата слика, наместо beach body диета за 7 дена, одлучете да поработите на вашиот ум, осамостојте се и не дозволувајте негативни влијанија да ве спречат да си го живеете животот онака како што сакате! Заеби кој што ќе каже или како ќе те погледне. 40 степени е, облечи бикини, облечи шорцеви или кратко фустанче, ок е.

ilustracijaaaaaa

Тимот на медуза

Напишано од:

Кика Авеиро

Aug 22, 2019

Тимот на медуза

ilustracijaaaaaa
Напишано од:

Кика Авеиро

Aug 22, 2019

Коментари
Scroll to Top