Десетици луѓе вчера се собраа на главниот плоштад во Приштина за да го изразат гневот поради седумчасовното силување на 11-годишно девојче во градскиот парк минатиот викенд.
Полицијата во понеделникот извести дека се уапсени пет лица, од кои тројца се малолетни. Судот во Приштина на двајца од нив им одреди 30-дневен притвор.
Демонстрантите маршираа низ центарот на Приштина до зградата на косовската Влада, каде истурија црвена боја врз влезната врата на институцијата и продолжија да извикуваат слогани против насилството врз жените. Демонстрантите истурија црвена боја и врз влезната врата на Министерството за правда и Судскиот и обвинителскиот совет на Косово.
„Државата не е единствената која потфрли дента кога се случи силувањето, ниту пак [државните] институции се единствените виновници. Сите потфрливме“, изјави Џералдина Реџепи од Приштина за време на протестот.
„Ние како колектив не правиме ништо. Не можеме да чекаме државата да ни ја заврши работата. Мора да тргнеме од себе за да направиме промена во општеството“, додаде Реџепи.
Друг демонстрант, Шукри Реткоцери, изјави дека злосторството го шокирало Косово и ги повика властите да ги испитаат судиите и обвинителите за да видат „дали ја вршат својата работа правилно“ кога станува збор за справување со случаи на сексуално насилство.
Во Косово, силувањето се казнува од две до десет години, додека во случаите со малолетници, казната е од пет до 20 години. Според Мрежата на жените на Косово, над 70% од случаите на сексуални напади и силувања во земјата се врз малолетни девојчиња.
EULEX објави дека за две години имало 228 пријави за силувања во Косово. Се верува дека над 90% од силувањата остануваат непријавени, што значи дека вистинската бројка е многу поголема.
Во анализа од мај оваа година, BIRN откри дека косовските судии најчесто носат поблаги пресуди во случаите на сексуално насилство.
Во студијата се вели дека од 2015 до 2020 година, биле поднесени повеќе од 521 обвинение за сексуално насилство. Но, само 140 пресуди резултирале со затвор, 189 предмети застареле, а 79 завршиле со парична и условна казна.
Во меѓувреме, Самедин Мехмети, директорот на полицијата во Приштина, поднесе оставка поради силувањето.
Во знак на солидарност, вчера беше организиран протест на плоштадот Скендербег во Скопје. Непосредно пред протестот, физички биле нападнати две активистки од непознат поединец. За Слободна Македонија организаторите на протестот изјавија: „Иако протестот беше најавен во Полициската станица Бит Пазар, единиците на СВР Скопје не беа навреме присутни таму“. Дури и на екипите на Брзата помош им требале повеќе од 20 минути да стигнат до плоштадот Скендербег и да укажат помош.
Извор: Balkan Insight; Exit Al
