,

Микејла Коел ве предизвикува да ја напишете приказната која ве плаши

Авторката и актерка Микејла Коел го освои посакуваното признание за нејзината серија „Може да те уништам“, која го фикционализира силувањето кое таа го има преживеано.

1265284

Микејла Коел ја освои својата прва Еми синоќа за нејзината феноменална серија „Може да те уништам“ (I May Destroy You), посветувајќи ја својата победа на сите жртви на сексуално насилство.

Хит шоуто од 2020 година ја следи протагонистката Арабела (која ја игра Коел), додека се обидува да ги состави сеќавањата од ноќта кога била силувана. Серијата е базирана на сопственото искуство на Коел со сексуален напад. Прифаќајќи ја наградата за „Извонредно пишување на лимитирана серија и/или антологија“, Коел – која е воедно првата црнкиња која ја има освоено оваа награда – изјави:

„Напишете ја приказната што ве плаши; што прави да се чувствувате несигурно; што не е удобна. Ве предизвикувам.

Во свет кој нè наведува да ги анализираме животите на другите, за полесно и подобро да одредиме како се чувствуваме во врска со себе – и за возврат да чувствуваме потреба постојано да бидеме видени, бидејќи видливоста овие денови како да се изедначува со успех – не плашете се да исчезнете од него, од нас, извесно време и да видите што ќе се појави во тишината“.

Коел заклучи: „Ја посветувам оваа приказна на сите кои преживеале сексуално насилство“.

Ова не е прва голема награда за „Може да те уништам“. Во јуни, Коел понесе БАФТА за најдобра мини серија и најдобра актерка, заблагодарувајќи се во говорот на координаторката за интимност на шоуто Ита О’Брајан, која исто така работеше на „Нормални луѓе“ и „Сексуалното образование“.

„Ти благодарим што постоиш во нашата индустрија“, рече Коел, „што го правиш просторот безбеден, што создаде физички, емоционални и професионални граници за да можеме да работиме на теми како експлоатација, губење на почит, злоупотреба на моќ, без да бидеме експлоатирани или злоупотребени во тој процес“. Зборувајќи за серијата на подкастот на Луис Теру во ноември, на прашањето како е да се пишува за сопственото искуство со сексуален напад, Коел изјави: „Кога вистински ги гледате последиците од справувањето со овие матни кражби на согласност, тоа може да биде навистина штетно. Може да има доста суптилни долгорочни ефекти. Сакав да го истражам тоа, со надеж дека и јас би можела да надраснам барем дел од штетата“.

Овој месец, Коел ја објави својата деби книга, „Неадаптирани: Личен манифест“ (Misfits: A Personal Manifesto), во која авторката, актерката и режисерка раскажува лични анегдоти од нејзиниот живот и работа и го исцртува своето патување низ реапроприацијата на својата креативност и моќ како жртва.

 

Извор: Dazed

Преведено од:

Тимот на Медуза

Sep 22, 2021

Коментари
Scroll to Top