На сите ни е потребна „Секс едукација“

Секојдневно успевам да се изнeнадам од неподготвеноста на оваа земја да им даде простор на умовите на младите да прогресираат и покрај сите можности кои ги нуди новата технологија, отвореноста и достапноста на информациите. Таков нов пример е аферата со групата „Јавна соба“ за меѓусебна размена на експлицитни, приватни фотографии и видеаод жени и девојки помеѓу мажи и момчиња и нивно користење како порнографски материјал.

Мене лично овој момент ми се синхронизираше со завршувањето на втората сезона на серијата „Секс едукација“ на Нетфликс, која лично ме воодушеви со својата отвореност и едукативност за сексуалноста кај младите, со сите нејзини можности и варијабилности.

Серијата ги опфаќа животите на повеќе средношколци, кои живеат во едно мало гратче во Велика Британија, каде што не се случува нешто особено, но сепак сите од нив имаат живи сексуални животи и се среќаваат со проблеми и хоризонтикои постепено ги откриваат. Главниот лик е Отис – момче на 15 години чија мајка е секс терапевтка, кој користејќи го нејзиното знаење станува советник за сексуални проблеми на учениците во училиштето.

Серијата на многу ненаметлив начин, преку постојана тензија, драма и хумор, успева да пренесе голем број теми поврзани со сексуалноста, а при тоа да не делува претерано или вештачки. Отворено разработува пансексуалност, бисексуалност, асексуалност и хомосексуалност. Решава проблеми со ерекција, мастурбација, ејакулација, сексуално задоволство и незадоволство, абортус, несакана бременост, сексуално преносливи болести, вагинизам и сексуални фетиши. Но не ги одминува ни општествените теми поврзани со сексуалноста како: неприфаќање на различноста, неможноста за целосно прифаќање на сопствената сексуалност поради притисоци од околината, одбивање на сексуалноста како нешто неприродно и нечисто, slutshaming (во недостаток на официјален превод – курвосрамење), и можеби најважно – сексуално вознемирување.

Екипата е прилично разновидна и тоа дава можност за разгледување на голем број прашања од различни аспекти. Но, да не добиете погрешен впечаток – и покрај обработката на сите овие теми во само 16 епизоди, серијата има главни ликови кои поминуваат низ сопствени психолошки борби преку кои растат и созреваат како личности. Меѓусебните односи, како и односите со родителите и авторитетите се основните двигатели на дејството во серијата. Со нивна помош креаторката Лори Нан успеала да ги постави сите ликови како на шаховска табла и постепено да ги повлекува потезите градејќи една меѓузависна, а сепак толку исполнета со содржина нарација што во секоја нова епизода само повеќе восхитува.

Обработката на карактери е исто фасцинантна и длабока, колку што може да дозволи времето, и успева да не се фати во замката на стереотипизацијата. Серијата ни претставува интелигентни ликови кои успеваат да се изборат за себе, нежни и чувствителни спортисти, крајно привилегирани насилници на кои ништо не им оди или неподносливи шмизли кои сепак водат свои тешки борби… Ништо не е онака како што очекувате или сте биле условени да очекувате.

Односите и релациите со родителите се исто разновидни: од екстремно либерални до ригидно конзервативни, од незаинтересирани и неприсутни до сочувствителни и поддржувачки, од напнато амбициозни до индиферентни и штетни, и секоја од тие релации е приказна сама за себе.

Што повеќе да кажам, а да не ви ја расипам оваа забавна серија која ги обработува важноста на другарството, поддршката и заедништвото на младите луѓе во нивните формативни години, како и круцијалноста од познавањето на сопствените тела, личност, сексуалност и потребата сето тоа да се прифати и разбере за да се оствари можноста за развивање во здрави и зрели возрасни личности.

„Сексуална едукација“ би им ја препорачала на сите, а пред сè на младите кои преку забава ќе научат повеќе за сексот, а ќе откријат и нешто за сопствената сексуалност. Уште повеќе би ја препорачала на оние кои киснат на перверзни групи како „Јавна соба“ и наместо да научат нешто повеќе за сексуалноста, ги восприемаат женските тела како објекти, а со тоа се оддалечуваат од вистинскиот начин да допрат до сопствените сексуални потреби и да најдат начин вистински да ги разберат и доживеат.

Бонус: Добри моменти од серијата