,

Ова не е трка, туку обид да се подигне свеста и да се поддржат жртвите на сексуално насилство

Клер Мекфарлен го избира спортот како начин да се исчекори кон промена, зашто тој ги обединува и поврзува луѓето. Но, и поради тоа што смета дека спортот е важен за физичкото и емоционално зацелување на тие кои преживеале насилство.

IIPT-Ambassador-for-travel-for-Peace

Промените ги создаваат луѓе кои умеат да инспирираат, а со својата храброст и мотивираност да биде гласот на тие што се безгласни, Клер Мекфарлен е токму таква жена.

Родена во Јужна Африка и подоцна преселена во Австралија, во деведесеттите години од минатиот век заминува да студира и работи во Париз. Во јули 1999 година нејзиниот живот комплетно се испревртува. На враќање од работа, таа е силувана, брутално претепана и оставена речиси мртва на патот од работа кон дома. Во обид да се справи со траумата и да продолжи понатаму, таа се враќа во Австралија.

Нејзиниот силувач бил откриен од полицијата десет години подоцна со помош на ДНК анализи. Нехуманиот третман од страна на системот, кој го почувствувала уште во париската болница, продолжил и после цела деценија. Откако го препознава сторителот, таа е принудена самата да покрие огромни трошоци за да ја истера судската постапка до крај. Осуден на 12 години затвор, силувачот отслужува само четвртина од казната и потоа е ослободен. Клер одлучува да продолжи со својот живот на поинаков начин и се посветува на мисијата да создаде кампања за подигнување на свеста за сексуалното насилство насекаде низ светот.

Така ја основа иницијативата Footsteps to Inspire, а подоцна ја формира и организацијата Мovement to Inspire. Користејќи го спортот како можност да дејствува на ненасилен начин против насилството, таа посетува десетици држави низ светот и организира групно трчање на рути од 16 километри, како симбол на нејзината 16 годишна борба со францускиот судски систем.

 

 

Неделава Клер е во Скопје, каде што се среќава со повеќе организации кои сакаат да ја поддржат нејзината мисија. Утрово разговаравме со неа и во Хелсиншкиот комитет за човекови права. Таа вели дека луѓето и се приклучуваат и од солидарност, и за да споделат приказна, но и за да прашаат како може да помогнат.

Кога зборува сексуалното насилство таа го користи зборот епидемија. Луѓето се погодени од сексуалното насилство повеќе отколку од канцерот. Тоа го илустрира со статистики од САД, каде 1 од 282 луѓе се погодени од канцер, додека соодносот на сексуално злоставувани е 1 од 10. Клер посебно ги истакнува приказните кои се однесуваат на деца. 230 милиони деца на светот се соочуваат со сексуално насилство. Овие случаи погодуваат и растревожуваат на посебен начин. Од Папуа Нова Гвинеја каде деца се злоставувани уште на шестмесечна возраст, се до случаите во развиените земји, каде што жртвите се приморани повторно да се соочат со насилникот во судовите и се повторно виктимизирани преку нехумани испитувања.

Промената на свеста на глобално ниво треба да се одвива паралелно и со системските промени- се согласуваме со Клер. Зборувавме и за потребата од системски промени, како што се посебните судови за процесирање сексуално насилство- нејзината Јужна Африка која важи за земја со многу насилство формирала вакви посебни инстанци со сензибилизирани и обучени судии. Поаѓајќи од сопствената траума во Париз, таа нагласува дека особено се важни квалитетните сервиси за прифаќање на жртвите на сексуални напади во здравствениот систем, нешто во што потфрлаат дури и скандинавските земји.

Клер сака да ги поттикне жртвите да зборуваат, но и да го разбие табуто околу сексуалното насилство. Од тие причини инсистира на инклузивноста на нејзиниот проект и смета дека поддршката и од мажите е многу значајна, затоа што и тие преживуваат вакво насилство, особено како тинејџери. Како позитивен пример ја истакнува неодамнешната трка во Србија, каде половината од учесниците биле мажи, а слична поддршка добила дури и од Обединетите Арапски Емирати.

Нашата неверојатно храбра соговорничка го избрала спортот како начин да се исчекори кон промена, зашто тој ги обединува и поврзува луѓето. Но, и поради тоа што смета дека спортот е важен за физичкото и емоционално зацелување на тие кои преживеале насилство.

Утре, на 1 јуни, таа ќе трча на кејот на Вардар заедно со сите кои сакаат да и се придружат. Стартот е во 7.30 часот, во близина на Паркот на Франкофонијата. Сите се добредојдени, вели Клер. Не мора да се истрчаат 16 километри. Правилата на овие настани се едноставни, да биде безбедно и да се трча во група. Ова не е трка, туку обид да се подигне свеста и да се поддржат жртвите.

 

#ibelieveyou #itwasntyourfault
#howcanihelpyou

ilustracijaaaaaa

Тимот на медуза

Напишано од:

Павлина Симоноска

May 31, 2019

Тимот на медуза

ilustracijaaaaaa
Напишано од:

Павлина Симоноска

May 31, 2019

Коментари
Scroll to Top