Еве го мојот најголем проблем со капитализмот: нè убедува да купиме производи што не ни се потребни преку манипулација со нашите реални емоции и чувства. На пример, неодамна влегов во една локална продавница додека барав пар панталони и наидов на маица на која пишуваше „women empowerment “ или нешто слично. Значи, нема ништо за овој бренд (колку што знам) што промовира феминизам – дали тие се потрудиле да вклучат повеќе жени во нивната работна сила, дали се однесуваат праведно кон женскиот труд – барем со исплаќање на минимална плата, дали донираат средства во добротворна организација која им помага на непривилегираните жени? Најверојатно не. Па, кога ја видов таа маица, сè што можев да помислам е како тие се насочени само кон жени – феминистки како мене кои можат да ја купат маичката без всушност да направат нешто со кое навистина ќе им помогнат на жените.
Тука има многу претпоставки (можеби брендот им помага на жените на некој начин, а јас едноставно не знам за тоа, затоа не го именувам самиот бренд тука), но има и други, поголеми примери за тоа како брендовите едноставно не успеваат да се придржуваат кон феминистичките идеали кои што ги пропагираат во своите реклами и ПР трикови, и едноставно провидни ми се.
На пример, на почетокот од оваа година, Најк ја промовираше кампањата „Dream crazier“, во која беа претставени моќни женски спортистки кои ги нарекуваат „луди“ поради тоа што покажуваат емоции на теренот. Ги охрабри жените да имаат големи соништа и да не дозволуваат некој да им застане на патот.
Но, на самиот почеток на оваа година се дозна дека Најк ја изгуби Алисон Феликс, една од најважните спортистки на годината, американска атлетичарка која се натпреварува во спринтерските дисциплини, откако и беше понуден доста поинаков договор по нејзиното забременување. Во една статија на Феликс за Њујорк Тајмс, атлетичарката тврдеше дека била во процесот на обновување на нејзиниот договор со брендот за време на нејзината бременост кога брендот понудил да и плати 70% од претходно договорената сума. Очигледно, атлетичарката била спремна да се согласи на тоа. „Ги прашав претставниците на Најк дали може во договорот да се гарантира дека нема да бидам казнета ако не успеам да постигнам одлични резултати неколку месеци пред пораѓањето. Претставниците на Најк одбија.“ напиша таа. Ова беше најголемиот проблем за Феликс.
Таа понатаму утврди дека вистинската причина поради која потпишала со Најк била тоа што мислела дека брендот навистина сака да помогне во зајакнување на позицијата на жените, а ако всушност не било така, можела да потпише со друг бренд за уште повеќе пари. „Кога се сретнав со лидерите на брендот во 2010, една жена ми кажа за иницијативата за спонзорство на Најк која се викаше „Girl Effect“ и промовираше адолесцентки како клучот за подобрување на општествата низ целиот свет. Со придружување на Најк, кажа таа, мислев дека ќе можам да помогнам во зајакнување на позицијата на жените. Таа ми кажа дека Најк верува во жените и девојките, а јас и поверував.“ – потврди таа.
Ако мислите дека одбивањето на нејзината понуда од страна на Најк е фер, потребно е да знаете дека Феликс пред некое време го надмина рекордот на Јусејн Болт, со тоа што доби 12 златни медали на Светскиот шампионат во атлетика во Доха, Катар.
Болт се смета за најдобриот спринтер на сите времиња, а Феликс го надмина неговиот рекорд 10 месеци откако се породи.
Најк очигледно сега ја смени политиката кога се работи за пораѓање, но сепак не сум особено импресионирана бидејќи истата беше сменета откако добија негативен публицитет поради тоа што Феликс реши јавно да се изјасни во врска со тоа што се случило. Излишно е да се каже дека веќе уште еднаш не купувам Најк патика за трчање.
Сепак, не треба само Најк да биде издвоен. Брендови низ целиот свет почнаа да сфаќаат дека феминизмот продава лесно. Жените имаат поголема заработка отколку што имале порано. Наеднаш има цела една нова демографска структура која може да купи многу повеќе продукти отколку што можеше во последната декада. Исто така, има и цел еден нов бран на нови работи – облека, спортска опрема, козметика. Сѐ што ќе посакаш. Сѐ што треба еден бренд да направи е да изгледа како да го промовира зајакнувањето на позицијата на жените и толку е потребно за баш истите тие жени да ги преплават продавниците.
Дури и бренд како Лукс реши да се вклучи во трендот – еманципација на жената за да им се продава сапунот. Пред некое време во една нивна реклама беше вклучена и Саба Камар, во која актерката зборуваше за тоа како била критикувана што носела кармин со појака боја или поради тоа што се смеела прегласно (морални политики на кои жените во Пакистан се подложени). Рекламата завршува со тоа што таа кажува дека не треба да се замараме многу што луѓето би кажале. Сепак, не сум во заблуда поради оваа иронија. Не треба да се замараме што би кажале луѓето, но би требало да нѝ е важно што Лукс пробува да нѝ каже? А, што всушност Лукс пробува да каже? Дека убава, гламурозна жена може да си дозволи да не се припотресува што ќе каже општеството. Вклучете жена со прекумерна тежина, или со темна боја на кожа, или жена која не е богата, па потоа кажете ми дали ќе може да се поклопи со стандардот што Лукс го постави за тоа што значи убавината во ова општество. Можеби е лесно за Саба Камар да не се грижи за тоа што велат луѓето, но за жал ние секојдневните луѓе ја немаме истата привилегија.
Значи – брендови, ако користите феминизам за продажба на вашите производи, еве го мојот совет: надминете ги овие еманципирачки реклами и всушност направете нешто што навистина би помогнало. Започнете мала добротворна организација која им помага на жртвите на семејно насилство, има илјадници жени заглавени во насилни домашни средини затоа што немаат каде да одат. Понудете конкурентни плати на вашиот женски персонал. Подобрете ги условите за работа (без разлика дали се машки или жени) на вашиот труд. И, замислете, потоа можете да ги користите овие убави гестови како ПР трикови! Промовирајте ги, соопштете му на светот за нив. Затоа што ако мора да заработите пари од нас, зошто истовремено да не се обидете да го направите светот подобро место?
Извор: Cutacut
