Терапија претставува платформа чија цел е креирање на простор за развој на независна културна и клупска сцена, а помина една година од нивното прво хибридно издание и 19 месеци без настан со физичко присуство.

Изминатата година преку платформата Терапија гледавме десетици хибридни настани и следевме настапи и сетови на над 30 локални и регионални диџеи кои ни помогнаа да се поврзуваме едни со други, кога физичката блискост беше невозможна.

Како пионерски проект за поддршка на електронската музичка заедница, Терапија наметнува и важни правила на игра, како за виртуалениот, така и за физичкиот простор, јавно и јасно спротиставувајќи се на расизмот, хомофобијата, трансфобијата и сексизмот и славејќи ја почитта кон другиот како врвен императив. Токму таков подиум – слободен и безбеден за сите, очекуваме да начекаме на првиот настан на Терапија со физичко присуство.

По повод својот прв роденден, следејќи ги здравствените упатства и протоколи, Терапија ни подготвува специјално издание „Dance therapy“ кое има за цел да нè приближи до сите оние кои ни недостасуваа, на 1 декември, во Станица 26, од 22:00 часот. После една година промоција и поддршка на, пред сè локалните, диџејки, пресреќни сме што ќе го имаме врвното задоволство да танцуваме на Alinka и Ивана Драгшиќ.

Alinka својата кариера ја започнува во легендарниот град на house музиката Чикаго. Таму ја стартува и сопствена продукција и соработките со цела една нова генерација хаус продуценти и диџеи еволуирајќи го стилот преку, Chicago house, Detroit techno и европските жанрови карактеристични за градови како Бeрлин, Лондон и Париз. Во 2012 на една импромту средба со поранешниот член и вокалист на Hercules and Love Affair, Shaun J. Wright и се менува животот засекогаш. Alinka и Shaun се здружуваат во сопствената издавачка куќа Twirl чие прво издание ќе биде промовирано од легендарниот хаус бенд “Classic Music Co”.
Успехот на нивните изданија и извонредниот диџејски талент ќе ги донесе во најзначајните клубови во светот. Alinka денес живее во Берлин и редовно настапува во Berghain/Panorama Bar. Нејзините ди-џеј сетови претставуваат рафинирана селекција на нова и стара и ретка хаус музика, совршено зачинета за според пригодата.

Ivana Dragsiqi трпеливо и непретенциозно дојде до своето место на клупската сцена, градејќи го со својата селекција на музика која содржи современа продукција засилена со ретки електронски изданија од најразличен жанр.

За својот прв роденден, од Терапија велат:

Во 2020 година ви го претставивме првото хибридно издание на платформата Терапија одржано во Крушево. Понатаму продолживме со оригинална содржина создадена на различни локации во Македонија. Многумина од вас имавте можност да видите артисти кои изведуваат во живо, но и специјални аудиовизуелни проекти.
И покрај тоа што проектите на Терапија беа нешто кое направи да се чувствуваме горди и среќни, сепак 19 месеци без физички настан се премногу. Свесни сме дека Ковид-19 е сè уште тука, но ќе се обидеме оваа година да направиме чекор напред, извесен рестарт, ако можеме така да кажеме.

Учество на настанот ќе може да имаат само оние кои ќе обезбедат доказ за вакцинирање со две дози, сертификат/потврда за прележан КОВИД-19 во последните 45 дена, сметајќи од денот на оздравувањето или медицинска потврда со негативен резултат од RT PCR SARS-CoV-2 тест, не постар од 72 часа.