Иако секој може да биде жртва на сајбер насилство, тоа е длабоко испреплетено со родово базираното насилство, со оглед на тоа што девојките и жените се најчести жртви на најпознатите и поекстремните форми на насилство преку интернет канали.
Кога зборуваме за односите на моќ, родовата еднаквост и/или родовите релации, не можеме да го игнорираме сајбер просторот и влијанијата на технологијата на нас како жени, кон соодветни алатки за отпор против опасносите кои се јавуваат токму во оваа сфера, но се дел од пошироки општествени процеси.
Несоодветното третирање на проблемот од интитуциите, недостатокот од истражување и соодветна легислатива, обвинувањето на жртвите како доминантен наратив, и финално, реткото казнување на насилниците, доведува до една атмосфера каде сајбер просторот (о)станува небезбедно место за жените, глобално. Практично, се бориме против форми на насилство кои сè уште ги немаме соодветно дефинирано и за кои не постои општествен консензус дека претставуваат насилство.
Во една таква атмосфера, каде во голема мера сме оставени сами на себе во однос на заштита, се прашуваме, на кој начин да бидеме побезбедни во сајбер просторот? Дали ограничувањето на изразувањето и слободата се легитимни мерки на (само)заштита или пак претставуваат форма на (само)цензура? Дали и колку треба да сме внимателни што објавуваме и испраќаме? И финално, како да бараме соодветна системска заштита, кога упорно гледаме како институциите потфрлаат во ова поле?
На 13 јуни (понеделеник), ве очекуваме во Комитет во 11:30 часот, заедно да разговараме на овие теми, да размениме искуства, совети и знаења, но и да го охрабриме нашето слободно и безбедно постоење во јавните сфери.
За своето лично, но и професионално искуство на темата ќе разговараат Ивана Смилевска (Радио МОФ), Катерина Иванова (ХЕРА Млади) и Славица Анастасовска (Хелсиншки комитет за човекови права – Скопје). Дискусијата ќе ја модерира Елена Петровска (Коалиција Маргини).
Настанот е организиран во рамки на проектот ,,Спречување, поддршка и застапување за родово базирано насилство” кој го спроведува Хелсиншкиот комитет за човекови права, со помош на грант обезбеден од страна на Балканската фондација за демократија, проект на Германскиот Маршалов фонд на Соединети Американски Држави и Норвешкото Министерство за надворешни работи.
