Деновиве на социјалните мрежи може да се сретне повикот за донации за твојата операција за потврдување на родот. Можеш ли да ни кажеш нешто повеќе за акцијата?
По подолго време размислување дали да го отпочнам тој тип на собирање на средства за операција одлучив тоа да го направам преку gofundme платформата. Акцијата е за донација на средства за операција која е доста скапа и не ја покрива фондот за здравство во Северна Македонија.
За жал, не сум во можност самостојно да ги покријам трошоците за хируршкиот зафат. И покрај тоа што сум редовно вработена како застапник и активист за трансродови права во граѓанскиот сектор и редовно плаќам здравствено осигурување, државниот здравствен систем не ги признава и компензира трошоците за ваква операција. Дополнително на сето ова, не можам да видам начин или перспектива дека ваквата политика би се променила во догледна иднина.
На кој начин оваа операција ќе ти го промени живтот и зошто токму сега се реши на овој чекор?
Последниот чекор од транзицијата е реконструктивен хирурчки зафат за промена на полот кој го заокружува целиот процес и ќе ми овозможи да живеам онака како што вистински се чувствувам. Мојот физички изглед ќе биде ускладен со мојата лична перцепција за самата себе си. И уште подобро, конечно ќе можам да живеам слободно, без чудни погледи попреку, без да бидам постојано осудувана, нема да бидам приморана да одговарам на непристојни и навредливи прашања, ќе живеам без стигма, дискриминација и закана од насилство на што сум била изложена многу пати до сега.
Бидејки после 4 години хормонска терапија време е да го завршам и последниот чекор од транзицијата. Мора да поминат минимум 1 година од отпочнат процес на хормонска терапија па за да можете да го направите и последниот чекор.
Зошто ваков тип на операција не е достапна преку нашиот здравствен фонд?
Не само оваа операција, за трансродовите лице не е пристапна ни една операција од страна на здравствениот фонд. Тука спаѓаат и операција на дојка (зголемување, мамопластика (импланти / липофилирање) кај трансродови жени, операција на дојка (поткожна мастектомија, создавање на машки гради) кај трансродови мажи, операција на гениталиите( пенектомија, орхиектомија, вагинопластика, клиторипластика, вулвопластика) кај трансродови жени и операција на гениталиите (хистеректомија / салпинго-оофоректомија, реконструкција на фиксниот дел од уретрата, што може да се комбинира со метоидиопластика или фалопластика (каде што се користи демнат или слободно васкуларизирано ткиво), вагинектомија, скротопластика и имплантација) кај трансродови мажи, хируршки интервенции кои не се ниту генитални, ниту торакални(постапки за феминизација на лицето, липосукција, липофилирање, постапка за третман на глас, намалување на јаболкото на Адам, зголемување на глутеусот (импланти / липополнување), реконструкција на косата и разни естетски процедури) кај трансродови жени и не-генитални, не-торакални хируршки интервенции: постапка за промена на гласот (ретко направена), липосукција, липофилирање, пекторални импланти и разни естетски зафати кај трансродови мажи.
Иако пред 2 години министерот Венко Филипче излезе и јавно проговори за овој проблем и посочи дека во иднина овие операции ќе паднат на товар на фондот, сепак тоа не се случи. По голем притисок од јавноста т.е од општата популација министерот излезе со став дека бил погрешно разбран и дека сето тоа нема да се случи. Нажалост, луѓето тука не сфаќаат колку им се потребни овие операции на (не)сите трансродови лица за да го остварат својот сон т. е да ја прилагодат внатрешноста со надворешниот изглед.
