Махса Амини е 22-годишната Иранка која почина неколку дена откако беше уапсена од т.н. морална полиција во Техеран бидејќи наводно носела несоодветен хиџаб. Во Иран, хиџабот стана задолжителен во јавност за жените и девојките постари од 9 години по Исламската револуција од 1979 година.

Амини била уапсена на 13 септември. Неколку часа по нејзиното апсење, нејзиното семејство било известено дека Амини е хоспитализирана. На 16 септември, беше објавено дека Амини починала од срцев удар, но очевидци тврдат дека таа всушност била претепана во комбето од страна на полицијата додека ја носеле во притвор.

Мојган Амини, мајката на Махса, во интервју за РСЕ непосредно пред веста за смртта на нејзината ќерка изјави дека нејзиното семејство поднело жалба до полицијата во Техеран. „Мојата ќерка беше во совршено здравје пред апсењето“, изјави таа.

Смртта на Махса Амини резултираше со протести низ десетици градови во Иран, почнувајќи од нејзиниот роден град Курдистан, главниот град Техеран, па се до помалите и конзервативни ирански гратчиња. На видеата од протестите, се гледа како жените и девојките ги палат своите хиџаби во знак на бес и револт, а на социјалните мрежи кружат и видеа во кои жените ги сечат своите коси во знак на солидарност. Се известува дека повеќе од 500 луѓе се приведени на протестите, а седуммина се убиени.