Малала Јусафзаи, родена на 12 јули 1997 година, е активистка за образование на девојките и жените и добитничка на Нобеловата награда за мир во 2014 година. Доделена кога имала само 17 години, таа е најмладата лауреатка на Нобелова награда во светот.
Таа е позната по застапувањето за човековите права, особено со фокус на правото на образование на жените и децата во нејзиниот роден регион Сват, каде пакистанските талибанци го забранија образованието за девојчињата, заради што Малала на свои 11 години морала да го напушти училиштето. Ова забрана го стимулирала активизмот на Малала, која почнала јавно да говори и застапува за образование за девојчињата во Пакистан, со што станала мета на напади. Во 2012 таа преживела атентат од страна на талибанците, и по бројни операции и рехабилитиација полека закрепнала.
По преживеаниот напад Малала живее во Бирминген, и продолжува да биде гласноговорничка за правото на образование. Во 2020 година дипломира на Оксвордскиот универзитет и продолжува со својата борба. Ширум светот, повеќе од 120 милиони девојчиња немаат пристап до основно образование. Девојчињата кои не се дел од образовниот процес често остануваат да бидат зависни од своите фамилии, а голем број од нив се принудени да се омажат рано.
Кај нас, иако не постојат правни бариери, постојат системски и културолошки пречки кои го оневозможуваат или отежнуваат пристапот до образовние на девојчињата. Пред почетокот на новата школска година важно е да нагласиме дека единствено еднаквото, достапното и квалитетното образование за сите деца е темел на едно здраво општество.
