Постои една добро позната народна поговорка „work hard – play hard”, алудирајќи на основното човеково право и потреба, работата да ја балансира со одмор и забава. Но, очигледно правилото не важи за секого, особено ако сте жена на јавна функција, а финската премиерка Санна Марин нè потсети токму на тоа. На крајот на минатата недела, снимката од политичарката како танцува на забава со блиски пријатели стана вирална, а медиумската бура и јавните коментари што следеа беа немилосрдни.
Додека многу луѓе застанаа на нејзина страна, а неколку дена по случката се појави видео компилација од жени што се журкаат, како симболичен солидарен гест, други (доминатно конзервативни струи) го осудија потегот како ирационален, неодговорен и потенцијално штетен за целата земја. Читајќи ги критиките, човек ќе си помисли дека мажите на јавни функции не допреле чашка алкохол во животот. Но, очигледно, границата на моралот се повлекува кај млада жена со моќ, која се осмелува да танцува на камера. И тоа, провокативно.
„Скандалот“ доминира во медиумите веќе неколку дена, а самата премиерка даде изјава во која вели дека ќе направи тест за дрога за да докаже дека немало нелегални активности, но дека нема ништо погрешно во начинот на кој го поминува своето слободно време.
Тоа што се прашуваме ние, е до кога дуплите стандарди ќе бидат стандард и кога ќе почнеме да се фокусираме на работата на жените на јавни функции, наместо начинот на кој танцуваат или каква фризура имаат. И финално, се прашуваме, зошто побогу конзервативците толку многу се плашат од жена која едноставно знае да ужива.
Патем, Санна Марин е премиерка на Финска од 2019 година, а како член на Социјалдемократската партија на Финска таа е пратеничка од 2015 година. По оставката на Анти Рин, Марин беше избрана за премиерка на 8 декември 2019 година. Преземајќи ја функцијата на 34 годишна возраст, таа е најмладата личност што ја извршува таа функција во финската историја, како и трет најмлад државен лидер во светот по Дритан Абазовиќ од Црна Гора и Габриел Бориќ од Чиле.
