Збор на годината: Согласност

Дискусијата за што се подразбира под согласност беше особено релевантна оваа година, со оглед на бројните настани на глобално ниво во чиј фокус беше сексуалната согласност или недостаток на истата, како движењето This is not consent во Ирска, протестите за поддршка на жртви од сексуално насилство на кампусите во САД, како и последиците на движењето #MeToo.

Што е согласност?

Согласност е договор помеѓу личностите да се вклучат во сексуалната активност. Согласноста не мора да биде вербална, но вербално да се согласите на различни сексуални активности може да ви помогне да ги почитувате границите на другите.

Како функционира согласноста?

Согласноста се базира на комуникација и тоа треба да се случи секој пат. Давање согласност за една активност, во едно време, не значи давање согласност за повторен сексуален контакт. На пример, согласувањето да се бакнете со некоја личност не и  дава дозвола на таа личност да ја отстрани вашата облека.

Својата согласност можете да ја повлечете во било кој момент, ако се чувствувате непријатно. Важно е јасно да му кажете на партнерот (или партнерите) дека веќе не сте задоволни со оваа активност и сакате да престанете. Најдобар начин да се осигурате дека двете страни се задоволни со било која сексуална активност е комуникација.

Што не се смета за согласност:

• Претпоставувајќи дека носењето одреден тип на облека, флертувањето или бакнувањето е покана за нешто повеќе.
• Личност онеспособена поради дроги или алкохол.
• Притискање на личност во сексуална активност со користење емоционални закани, страв и/или заплашување.
• Претпоставувајќи дека имате дозвола да се вклучите во сексуален чин, бидејќи сте го направиле тоа во минатото…

Она што е релеватно да се напомене кога зборуваме за сексуална согласност е нужноста од сеопфатно сексуално образовние, со чија помош ќе им се помогне на децата и тинејџерите да ги разберат нијансите на сексуалната согласност. Па така, наместо да ги учиме девојките и жените (кои се најчести жртви на сексуално насилство) да внимаваат како се облекуваат, да не се движат и излегуваат сами, да не конзумираат алкохол и слично, фокусот треба да биде кон едукација за почитување на границите на другите и воспоставување на здрави сексуални врски.

Се надеваме дека во 2019 ќе почнеме да ги гледаме плодовите од дискусијата за сексуалната согласност!