Зошто Скопје Прајд?

Пред точно една година се случи првата Парада на гордоста во Скопје,  односно протестен марш кој имаше за цел да го сврти вниманието на јавноста кон нееднаквоста со која живеат ЛГБТИ луѓето во нашата земја.

Во име на јавното здравје, оваа година не ги окупираме улиците, но страста и борбата за општество во кое различностите се прифаќаат и прославуваат, останува иста. Лани прашавме  неколку ЛГБТИ активисти, активистки, борци и борки за човековите права, поддржувачи и пријатели зошто ним им е важно да се излезе на Скопје Прајд, а бидејќи одговорите и оваа година се релевантни, ви ги пренесуваме повторно. ♥

Скопје Прајд за мене е ослободување, прослава, и гордост во сопствениот идентитет. Некои луѓе не го разбираат тоа, и тоа е океј, прајдот постои за таа цел и можеби не оваа година, но со текот на времето ќе ја пренесе пораката. Прајдот за мене е политичко движење, како и сите други протести, прајдот јавно кажува и ја потврдува видливоста на ЛГБТИ заедницата. Прајдот пренесува порака дека не сме сами во оваа битка за човекови права и слободи, и дека на крајот на денот, сите сме тука да оствариме заеднички цели.
Стефан Петровски
Субверзивен Фронт

Прајд затоа што се уште нема слобода на изразување, затоа што има само деклараривни заложби и затоа што ништо суштински не е променето. Дискриминирани, напаѓани, незаштитени покажуваме дека сме тука и бараме еднаквост!

Јована Јовановска
ЛГБТИ Центар за поддршка Скопје   

Гордоста претставува опозициска, дисензуална структура на чувствување изградена низ колективен напор, политика на емоции која се спротивставува на логиката некој да се посочува со прст, да те засрамува за тоа кој си, кого сакаш, каков културен и социјален живот формирате. На овој начин гордоста претставува и превртување на логиката на “расипаниот” идентитет кој ви наметнува да се срамите и да го унижите секој јавен изблик на знаците кои се асоцирани со вашиот идентитет, да се срамите од најмалиот пробив на бидувањето геј. Гордост, заради тоа што излегувате во јавниот простор во контекст во кој сте исклучувани, дискриминирани, жртви на говор и континуирано насилство од омраза. Деца и млади луѓе се исклучувани од семејствата, стигматизирани во училиштата, демонизирани во медиумите, а во институциите, особено транс луѓето, се девалвирани. Во таква социјална атмосфера на понижување излегуваме на улица, во општество во кое од сите страни ви велат дека сте „изопачени, болни, настран”, дека не заслужувате да живеете, дека не го исполнувате стандардот на човечкото. Па зарем ова е мала причина да се чувствувате гордо, во најмала рака, ако на ништо друго, тогаш на силата, истрајноста и упорноста да преживеете и да креирате социјален свет во еден таков контекст. Одовде, на што има да се гордеат стрејт и родово нормативните луѓе? На глаткото газење по патеки кои се веќе истапкани и направени согласно потребите на нивните тела и желби? На удобното тонење во простор модулиран согласно нивните животни патеки, интимности и форми на живот? На неприметното задоволство да се препознаат и најдат валидација на своите желби, сексуалности и родови отелотворувања на секој чекор, во секој ќош на јавниот простор? На неподносливата леснотија на живеење во хетеронормативен свет – нарцисоидно огледало на самите себе? ЛГБТИ луѓето, настраните, во таков контекст решаваат да излезат надвор, да ја заземат улицата која е заеднички простор, и да бидат видливи наспроти оние кои им велат „останете во 4 ѕида“, да го реапроприираат јавниот простор и да ја остават трагата на своето постоење, да го тврдат правото на споделување на заедничкото, и негова трансформација.
Славчо Димитров
Куратор на Скопскиот викенд на гордоста

За мене Парадатa на гордоста е протестен марш. Чекор за слобода, еднаквост и права. Ќе излезам во сабота затоа што верувам дека можам, смеам и морам да вложам во општеството во кое сум се родила, живеам и веројатно ќе умрам. За себе, за генерациите пред мене, и за оние кои допрва ќе дојдат. Парадата е само уште еден чекор во мноштвото други кон целта. А целта е пристоен и достоинствен живот за СИТЕ!
Ирена Цветковиќ
Извршна директорка на Коалиција Маргини

Никогаш се немам почувствувано поконфорно во сопствената кожа и послободна во своите избори, отколку од кога почнав да стапувам во блиски врски со квир личности, кои ми ги редефинираа начинот на живот, идеите за пријателство, (себе) прифаќање, љубовта и гордото постоење наспроти секоја логика на опресивното мнозинство.
ЛГБТИ заедницата СЕКОГАШ била прва на улица во борба за праведно, правично, еднакво и слободно општество и СЕКОГАШ била вокална, храбра и бескомпромисна во таа борба.
Во сабота излегувам на улица и очекувам сите личности кои имаат капацитет да разберат колку е овој настан важен, исто така да излезат на улица на протестната парада, бидејќи јавниот простор ни припаѓа нам, колку и на сите други. Излегувам на улица бидејќи сум страшно горда на квир историјата и на секоја победа која „обратните“ несебично ја водат за слободата на сите. Излегувам на улица бидејќи сум горда на сите oние кои исправено се спротиставуваат на лудите правила на хеторопатријархатот од кој патиме сите. ЛГБТИ заедницата се бори со овој систем буквално секој ден: време е да се даде поддршката која навистина ја заслужува. Жена Борец 11:00 часот.
Калиа Димитрова
Главна уредничка на Медуза

Со крената глава и без страв да го поддржиме Skopje Pride. Со видливоста ќе пратиме порака дека постоиме и сме тука заедно со останатите. Дојдете заедно да маршираме.
Лила Милиќ
Активистка за правата на сексуалните работници и трансродовите лица

Кршиме табуа, незнаење, неразбирање, неприфаќање. Парадата им е потребна токму на тие, неразбраните, неприфатените, стигматизираните. Во тој еден ден ќе бидат горди за својата величествена различност, на тој ден ќе можат да бидат еднакви во својата посебност.
Уранија Пировска
Извршна директорка на Хелсиншки комитет за човекови права на Република Македонија

Пред сé, затоа што Скопје Прајд е протест! Протест против опресивни политики, протест против дискриминацијата и стигматизацијата со кои заедницата се соочува секојдневно и во секоја сфера, протест затоа што кога на транс лица им се обезбедуваат здравствени услуги македонската јавност влегува во колективна трансфобична хистерија и Министерството за здравство се повлекува од одлуката, протест за заземање на јавниот простор кој и припаѓа на заедницата исто колку и на секој друг! Протест, затоа што ни еден од напаадите врз ЛГБТИ Центарот се уште не се расчистени. Скопје Прајд затоа што млади луѓе секојдневно живеат во страв да бидат “откриени”, како дома така и од своите блиски, своите соученици, своите професори и работодавци. Скопје Прајд затоа што еднаквоста и достоинството на лицата од заедницата се ЗАГАРАНТИРАНО право, а не покана за дебата на широката јавност! Скопје Прајд затоа што моите најблиски секој ден ми покажуваат што е љубов, прифаќање и радикално бидување свој, па затоа Скопје Прајд, за да го заземеме просторот кој е наш, во кој имаме право да се движиме, да постоиме, да се сакаме, да чувствуваме хистерија, болка, тага, среќа и магија. Скопје Прајд за да покажеме дека сме тука, дека сме гласни, дека сме горди и дека процесот на реапроприација на јавниот простор и јавниот дискурс е започнат, и веќе нема да правиме компромиси.
Ена Бендевска
ЛГБТИ Центар за поддршка и Медуза

Затоа што никој не е слободен, додека сите не се ослободат.
Кочо Андоновски
Програмски директор на ЛГБТИ Центар за поддршка Скопје