Режија: Hugh Wilson
Улоги: Goldie Hawn, Bette Midler, Diane Keaton
Времетраење: 120’
Земја: САД
Жанр: комедија, драма
Клубот на првите жени е американскa комедија од 1996 година во режија на Хју Вилсон, базиран на истоимениот роман од 1992 година на Оливија Голдсмит.
Очајна поради повторното стапување на нејзиниот бивши сопруг (со помлада жена), Синтија се решава да се самоубие. На погребот, нејзините другарки од факултет (Бет Мидлер, Голди Хоун и Дајан Китон) се обединуваат за прв пат по речиси 30 години. Кога ја откриваат причината за самоубиството на нивната другарка, сфаќаат дека сите нивни поранешни сопрузи ги земале здраво за готово – и одлучувајќи дека е време за одмазда, склучуваат договор да им вратат на своите бивши, за сета неправда и болка со која се соочуваат.
Вредноста и важноста на пријателството, особено во трансформативни животни периоди, е централна тема во овој филм, заедно со прикажувањето на притисоците кои доаѓаат со возраста, а со кои најчесто се соочуваат жените. Разведени, осамени и запоставени, овие три другарки, сфаќаат колку многу нешта имаат заедничко во оваа доба од животот и го користат моментумот на трагедијата која повторно ги зближува, за да си помогнат една на друга одново да најдат смисла и возбуда во своите животи.
Сепак, овој класик од 90тите, е проблематичен во неколку точки. Одмаздата кон бившите, како мотив за „нов почеток“, повторно им дава централно место на мажите во овој наратив, и дополнително, се покажува како токсично за нивното пријателство. Новите жени на нивните бивши се прикажани како празноглави девојки и главни негативки, па така овој филм иако има за цел да го прослави женското пријателство, потфрла да прикаже поширока женска солидарност и да го прикаже ејџизмот како системски проблем, надовор од рамките на трите приказни кои ги следиме одблизу.
Но, и покрај тоа, понекогаш, потребна ни е приказна како оваа: топла, забавна, и со среќен крај. Тоа што започнува како класичен одмазднички филм, се претвора во приказна за наоѓање сила и енергија за новите почетоци. Баш поради ова „Клубот на првите жени“ е филм кој дефинитивно треба да се изгледа во јануари.
