препорачува: Дарко Алексовски, визуелен уметник
Наслов: Matthias & Maxime
Режија: Xavier Dolan
Играат: Gabriel D’Almeida Freitas, Xavier Dolan, Anne Dorval
Земја: Канада
Времетраење: 119′
Жанр: драма, романса
Matthias & Maxime е филм за друштво од неколку пријатели помеѓу кои има блиска, ноншалантна динамика; пријатели кои се познаваат уште од детството и целото свое време го поминуваат заедно. Еден од аспектите на оваа динамика, како и емоциите во целото друштво, се менуваат кога двајца од пријателите, Матијас и Максим, случајно и по пат на облог стануваат главни протагонисти во краткиот студентски филм на Ерика (сестра на еден од пријателите) кој вклучува сцена во која тие треба да се бакнуваат.
Ниедна листа од филмски предлози нема да ми биде комплетна без филм на Долан. Сите негови филмски приказни се базираат на некаква невозвратена љубов, нереализирани желби, тишина, осаменост, комплексни и неразјаснети пријателски врски, комплицирани релации помеѓу деца и родители (најчесто син/ови и мајка/и). Matthias & Maxime е уште еден таков филм, полн со навидум случајни ситуации, моменти на двоумење и тензија, идиосинкратичен избор на музика (мислам дека е единствениот филм што неиронично ја користи „Work B**ch“ на Бритни Спирс) и прекрасно доловени поетски кадри полни со топли и интензивни бои.
