Режија: Sara Dosa
Наратор: Miranda July
Времетраење: 93’
Земја: САД
Жанр: документарец
Катја и Морис Крафт беа заљубени во две нешта – еден во друг и во вулканите. Преку две децении, смелите француски вулканолози беа заведени од возбудата и опасноста на овој елементарен љубовен триаголник.
Во филмот го гледаме парот како талка по планетата, гонејќи вулкански ерупции и документирајќи ги своите откритија. На крајот, Катја и Морис ги губат животите во вулканска експлозија во 1991 година, оставајќи во наследство книги, филмови и информации што засекогаш го збогатија нашето знаење за природниот свет.
Режисерката Сара Доса и нејзиниот тим на монтажери прегледале преку 250 часа архивски снимки направени од експедициите на Катја и Морис – Катја фотографира, а Морис снима – за да ја создадат оваа поетична прослава на експлозивниот дух на храбрите научници.
Како што забележува Matt Zoller Seitz за Roger Ebert: „Нивната заедничка работа не само што произведе мноштво неверојатни слики што можат бескрајно да се преработуваат и да се користат за различни намени, туку и му нуди цела една галерија на метафори за љубовта, страста, опсесијата и посветеноста на секој иден филмаџија кој би се обидел одново да ја раскаже нивната приказна“.
„Оган на љубовта“ е приказна за исконскиот циклус на создавање и уништување на Земјата. Тој е ода за бестрашното впуштање во непознатото, за желбата да се разберат овие геолошки феномени и срцебиењето на земјата. „Разбирањето е второто име на љубовта,“ се вели во филмот.
И покрај тоа што се работи за документарец кој пред сè ја естетизира бестрашноста на овој пар и во умерена доза ја романтизира нивната релација*, „Оган на љубовта“ сепак говори за човечката маленкост и понизноста која ја чувствуваме пред грандиозноста на природата која не ја разбираме во целост. Пред самиот крај, филмот ја отвара и темата за улогата на геолозите во обидот за спречување на природните катастрофи и одговорноста на властите да не ги занемаруваат нивните предупредувања за евакуација.
* За подетален и научно научно базиран документарец за вулканите низ светот погледнете го Into the Inferno (2016) на Werner Herzog или неговиот The Fire Within (2022).
