Режија: Hayao Miyazaki

Гласови: Yôji Matsuda, Yuriko Ishida

Времетраење: 133

Земја: Јапонија

Жанр: анимација, фантазија

„Принцезата Мононоке“ е повеќеслоен филм кој се занимава со конфликтот помеѓу природниот свет, претставен преку интелигентните животински духови на шумата и нивната предводничка Сан, истоимената принцеза Мононоке, и индустријализацијата и технологијата, претставени преку Железниот град каде се произведува оружје, каде владее Лејди Ебоши во улога налик воен командант.

Интересно е тоа што овој конфликт првенствено се води низ два моќни женски ликови, Сан и Лејди Ебоши, кои на почетокот на филмот се прикажани како жени кои им пркосат на традиционалните родови стереотипи и улоги. Сан има дива природа и живее „нецивилизиран“ живот во шумата со животинските духови, а Лејди Ебоши зазема традиционално „машка“ улога и своеглаво стои на страната на напредокот по цена на природниот свет. Поради тоа и двете жени се сметани за неприродни, па иако филмот ја прикажува нивната субверзивност, разрешницата води повеќе во насока на нивно дисциплинирање.

Иако во преден план на филмот се развиваат приказните на неколку клучни човечки ликови, приказната за шумата и самата природа е исто толку важна и сликовита. Тука лежи генералната порака на филмот за тоа како да се почитува природата дури и, или пак, особено тогаш кога сме насочени кон унапредување на технологијата и човештвото.