Режија: Maria Schrader
Улоги: Carey Mulligan, Zoe Kazan, Patricia Clarkson
Времетраење: 129′
Земја: САД
Жанр: Драма
Во филмот „Таа кажа“ од 2022, базиран на вистински настани, новинарките на Њујорк Тајмс, Меган Тјухи и Џоди Кантор објавуваат сторија во која се разоткриваат наводите за сексуална злоупотреба против моќниот холивудски продуцент Харви Вајнштајн. Истата таа сторија служи и како отскочна даска за движењето #MeToo.
Наративот се обидува да балансира помеѓу истражувачката работа и праватниот живот на двете новинарки: Меган се бори со постпородилна депресија, додека Џоди е мајка на две мали деца. Додека филмот јасно ја покажува суштинската поддршка што и двете протагонистки ја добиваат од нивните сопрузи и уредници, не е докрај јасно како, со оглед на своите приватни околности, успевеат да го посветат речиси сето свое време на истражувачката сторија (постпородилната депресија со која се соочува Кантор е накратко прикажана на почетокот на филмот, а потоа некако е голтната од другите дејства во филмот).
Имајќи ја таа слабост предвид, „Таа кажа“ сепак успешно носи две клучни поенти низ наративот. Жртвите, стресот, храброста и посветеноста (често на сметка на сопственото [ментално] здравје) во сферата на истражувачкото новинарство се несомнени, а особено предизвикувачки кога станува збор за новинарки. Од друга страна, во моменталната системска поставеност, еднинствено таков вид на темелна истражувачка работа има потенцијал да обелодени насилство кое е системски овозможено, како што е и случајот со Вајнштајн. Преку истражувачката работа на протагонистките и нивната комуникација со повеќебројни жртви на Харви, станува јасно колку е тешко да се скрши тишината поврзана со сексуалното вознемирување и насилство и колку е важно да се истражуваат системите кои тоа го овозможуваат, а не само индивидуалните случаи. Вознемирувачки е да се размислува колку слични стории во врска со истиот човек биле замолечни пред оваа, а уште повознемирувачки е да се размислува за тоа колку е ретко да се даваат такви ресурси на долгорочен истражувачки проект. Кој ќе пишува за сите други Вајнштајни?
