„Багет полн печени полжави полиени со уље истечено од Вардаровите галии“ е концепт-збирка од десет песни со кои низ хумористично-сатиричен начин авторот пробува да даде коментар или критика теми поврзани со градот и состојбите во него, со младите и младоста како концепт, темата на идентитетот, родот, сексуалноста, како и за одредени книжевни состојби на македонската книжевна сцена.  

Стефан Спасовски за книгата вели: Читајќи ги овие песни, лесно се навраќаме низ историјата на книжевноста. Медиќ Лазаревски усетно комуницира со поезијата на Цара, Гинзберг, Конески, Шопов, Дирјан, Џепароски, Ќулавкова, но и директно со нив, создавајќи стихови кои, веројатно, би се читале и на надреалистичките кружоци во Париз. Често поаѓајќи од вистински настани и од ликови кои нѐ опкружуваат се истакнува ангажираноста, современите и вечни прашања и теми, преку кои доловува свет во кој иронијата ја има Сократовата задача – да се дојде до посакуваниот одговор или, можеби, посакуваниот свет за живеење. Во овие стихови сето маргинализирано е ставено во центар, па не е чудно и да се запрашаме: Каде се наоѓаме?

Промоцијата ќе се одржи во рамки на втората вечер (27.9., сабота) од фестивалот за младинска, алтернативна и критичка култура „Ре-култура“ во кафе-книжарницата „Буква“ со почеток во 21 часот.