Кажи ми да чујам – Марија Велинова

Авторска песна

2

кажи ми да чујам

МАРИЈА ВЕЛИНОВА

 

        на прабаба ми

 

ајде кажи

кажи ми за себе

кажи за секоја

тртка и бемка и семка

на кајсијата во дворот

дали лесно се лупи

кажи ми за сонот

во кој тепаш слонови

кажи дали тоа се 

маките твои големи

кажи ми за комшиката

дека скарани сте

а сестра ти е

 

и утре пак истото

и утре фустанот 

и шамијата

и да не одам боса

и да не одам гола 

и да ги спуштам ролетните

– комшиите да не ме видат

и да не седам до касно

и да си сркнам шеќерче

и после притисокот паднат

– шеќерот дигнат.

 

а може утре

да ги скинеме заедно

и шамиите

и комшиите

и може утре

да ги гушнеш слоновите

од соновите

и босонога и гола

ко самовила во ангола

да трчаш лишена

од болката во колкот

и болката поради молкот

со крилјата возвишена

да полеташ за да те видат

да запееш за да те чујат

ко што ми кажуваше

за јас да чујам

 

може утре

да создадеме сѐ

освен историјата

на она што го создаваме

 

*

 

о! време

гневно на часовниците

ќе те свртам назад

и ќе те бакнам

во ритам на тамтамот

што чука за отпор



НАПИШАНО ОД:

Тимот на Медуза

Feb 23, 2024

Коментари
Scroll to Top