Револуционерно писмо #107

ДИЈАНА ДИ ПРИМА

Тие се она што сме ние

а ние сме гладни за

вода

за земја

или воздух

преноќиште

а тие се нашите внуци.

Фотографија: WashingtonPost

Родена во 1934 година, Дијана ди Прима израснала во Бруклин. Иако водела долг и богат живот како многу повеќе од бит поетеса – мировна активистка, мајка на пет деца и посветена зен будистка – Дијана останува најзапаметена како една од ретките жени битници (Beatniks) во битка со општествениот конформизам среде инаку немилосрдна мачо и неретко мизогина, њујоршка бит сцена. Нејзините „Револуционерни писма” се невообичаен спој на утописки анархизам и еколошка свесност, напишани низ призмата на феминизмот и Зен будизмот. Песните циркулирале по „подземните” весници во доцните 60-ти, а Дијана ја надополнувала збирката до нејзината смрт во 2020. Како прирачник за уличен активизам, феминистичка солидарност и слободно живеење, писмата на Дијана се релевантни за денешните воени превирања и општествени кризи исто колку што биле пред педесетина години.