Пријави се на феминистичката школа ФЕМ 101.2 организирана од Медуза и Тииит!Инк. и збогати ги своите знаења и вештини во областа на феминизмот.
Школата има за цел да ги подготви учесничките и учесниците за успешно читање на феминистички наративи, аргументирано пишување и застапување преку креативен израз. Школата е составена од 5 предавања и 7 работилници, распределени низ 2 месеци, почнувајќи од 15 март 2021 година.
Школата ФЕМ 101 ќе ве запознае со клучни концепти од феминизмот и родовите студии, ќе ви помогне во себе-изразувањето, и ќе понуди креативна платформа за здружување и споделување.
Познавањето на феминистичката историја, стратегии на отпор и методи на креативен феминистички израз можат да нè зајакнат во борбата против родовата нееднаквост, да ни помогнат во критичкото преиспитување на односите на моќ, родовите релации и нашите сопствени позиции.
Обуките ќе ги водат реномирани теоретичарки, професорки, феминистки со обемно искуство и знаење во полињата во фокус на школата: Ирена Цветковиќ, Ана Мартиновска, Елизабета Шелева, Адријана Захаријевиќ, Јани Сунден, Емилија Петреска-Камењарова, Румена Бужаровска, Сузана Милевска, Kумјана Новакова и Јана Јакимовска. За времетрањето на школата, учесничките /ците ќе имаат можност за практична работа, како и вклучување во тимот на Медуза преку креација и објавување на содржини и по завршување на школата. Програмата е наменета за девојки и жени, сексуални и родови малцинства.
Пријавување
За да учествувате треба:
– да ве интересира феминизам и родова еднаквост
– да имате мотивација да пишувате текстови во дадената област, иако претходно искуство не е неопходно
– да бидете во можност да ги посетувате сите обуки
Рокот за пријавување трае до 7 март 2022 година.
Пратете ја вашата кратка биографија и писмо со мотивација (максимум една страна) за учество на школата на info@meduza.mk со назнака „Апликација за Фем 101“.
Доколку имате дополнителни прашања, пишете ни на истиот мејл или на Фејсбук/Инстаграм страната на Медуза.
Биографии на предавачи:
Ана Мартиноска е професорка, научничка во областа на фолклорот, литературата и културата, колумнистка на родови и културолошки теми, феминистка. Од 1996 год. д-р Мартиноска е вработена во Институтот за македонска литература, во Одделението за македонска народна литература. Во моментов е на работното место научна советничка/редовна професорка. таа има објавено и стотина самостојни научни трудови во стручната и научна периодична литература во земјата и во странство, како и над двесте колумни на културолошки и родови теми во неделникот „Глобус“ и во дневниот весник „Нова Македонија“. Се занимава и со преведување на стручни трудови од англиски и српски на македонски јазик и обратно. Мартиноска била главна и одговорна уредничка на Институтското списание за литературна наука „Спектар“ (2013-14). Била членка на редакцијата на електронското списание „Блесок“ (2012-18), одговорна за рубриките Критика и Есеи. Членка е и на Друштвото на писатели на Македонија, Здружението за компаративна книжевност на Македонија и на Меѓународната Асоцијација за компаративна литература (ICLA). Мартиноска е Претседателка е на Научниот совет на Институтот за македонска литература.
Сузана Милевска е теоретичарка и кураторка на визуелна уметност и култура од Македонија. Во моментов е на истражувачки престој во Künstlerhaus Büchsenhausen во Инсбрук. Од 2016-2019 Милевска беше главна истражувачка на Политехничкиот универзитет во Милано за проектот TRACES од програмата Horizon 2020. Од 2013-2015 Милевска беше назначена за прва професорка по Централноевропска и јужноевропска историја на уметност на Академијата за ликовни уметности во Виена. Докторските студии по визуелна култура ги завршила на колеџот Голдсмитс во Лондон, a во 2004, Милевска е добитничка на стипендијата Фулбрајт во Конгресната библиотека во Вашингтон. Во 2011 станува истражувачка во проектот „Повикајте го сведокот“ – Ромски павилјон на 54 Меѓународна уметничка изложба – Венециското Биенале – колатерален настан и ги курира изложбите „Повикајте го сведокот“, „БАК“, „Утрехт“ и “Ромскиот протокoл” во австрискиот Парламент. Во 2015 заедно со Аленка Грегорич ја курира изложбата Одвнатре нанадвор-не толку бела коцка во Градската уметничка галерија во Љубљана. Во 2010 Милевска ја издава книгата Родовите разлики на Балканот и ја уредува Машината за преименување: Книгата, а во 2016 ја уредува книгата За продуктивниот срам, помирувањето и моќта на делување, SternbergPress, 2016.
Ирена Цветковиќ е доктор од областа на родовите студии. Како млад истражувач работела на многу истражувачки проекти од областа на социологијата, родовите студии и медиуми. Беше авторка на општествено ангажираниот блог Фемгерила, а потоа и колумнистка во дневниот весник Дневник. Таа е активистка за човековите права на маргинализираните заедници, а особено се бави со активизам за правата на ЛГБТ лицата, корисниците/чките на дроги и сексуалните работници/чки. Активна е во неколку формални и неформални активистички здруженија. Во моментов е извршна директорка во Коалицијата Маргини.
Румена Бужаровска е писателка, книжевна преведувачка и професорка. Дипломирала, магистрирала и докторирала на Филолошкиот факултет „Блаже Конески“ при Универзитетот „Св. Кирил и Методиј“ во Скопје. Работи како професорка по американска книжевност на англиската катедра при истиот факултет. Објавила четири збирки раскази: Чкртки (Или-или, 2007), Осмица (Блесок, 2010), Мојот маж (Или-или, 2014) и Не одам никаде (Или-или, 2018), како и студија за хуморот во книжевноста За смешното: теориите на хуморот низ призмата на расказот (Блесок, 2012 ). Расказите ѝ се објавени во превод на повеќе од 10 јазици.
Јана Јакимовска дипломира и магистрира на сликарскиот оддел на факултетот за ликовни уметности во Скопје. Се занимава со сликарство, дигитални медиуми, графички дизајн, фотографија, илустрација и интервенции во јавен простор. Нејзиното најново творештво се фокусира на феминистичкиот аспект, разгледан низ призмата на телото, себството, сексуалноста и позицијата на жената во општеството денес. До сега имала петнаесет самостојни изложби во Њујорк, Скопје, Белград, Приштина, Куманово, Гевгелија и Штип. Учествувала на бројни групни изложби во Македонија, Србија, Хрватска, Босна и Херцеговина, Турција, Грција, Италија, Литванија, Германија и САД. Работи како вонреден професор на Ликовната академија на Универзитетот Гоце Делчев во Штип.
Адријана Захаријевиќ е виш научен соработник на Институтот за филозофија и општествена теорија при Универзитетот во Белград, и доцент на родовите студии на Универзитетот во Нови Сад. Истражувачките интереси на Захаријевиќ се развиваат во два правци: прво, историја и теории на движењата на жените и на Запад и на Исток, особено во Југославија и современа Србија, со посебен нагласок на антимилитаризмот, антинационализмот и, од скоро, антикапитализам; второ, теоретска и историска основа на современиот неолиберализам. Таа објавува на различни теми во рамките на политичката филозофија (критика на либерализмот, феминистичка филозофија и критика на насилството) и активистички студии (влијание, превод и критика како ангажман). Нејзините текстови се преведени на неколку европски јазици. Захаријевиќ има објавено две книги, и на српски јазик, „Станување жена“ (2010) и „Кој е поединец? – генеалошка истрага за идејата на граѓанинот“ (2014), и во моментов работи на ракопис за политичката филозофија на Џудит Батлер, фокусирајќи се на влијанието, секојдневниот живот и ненасилството. Таа редовно пишува мислења во дневни и неделни весници, како и (интер)национални академски блогови.
Јани Сунден е професорка по родови студии на Универзитетот Седерторн во Стокхолм. Нејзината работа се наоѓа на пресекот на студиите за дигитални медиуми и технологија, родови и сексуални студии, феминистичка и квир теорија и теорија на афект. Таа моментално работи во полето на настраноста (queerness) и дигитална интимност; феминистички тактики на социјалните медиуми кои користат хумор за да се спротивстават на сексизмот; и геополитиката на дигиталните сексуални култури низ нордиските, балтичките и англо-американските контексти. Таа е авторка на Who’s Laughing Now? Feminist Tactics in Social Media (MIT Press, 2020, with Susanna Paasonen) и Gender and Sexuality in Online Game Cultures: Passionate Play (Routledge, 2012, with Malin Sveningsson).
Елизабета Шелева e професорка на Филолошкиот факултет во Скопје, на Катедрата за Општа и компаративна книжевност (каде го предава предметот: “Феминистичка критика”). Се занимава со книжевна критика, теорија и културолошки студии. Долгогодишна уредничка на „Наше писмо“ и „Sarajevske sveske“. Колумнистка на весникот „Дневник“ (во 2000 год) и магазинот „Форум“ (во 2008 год). Авторка е на 11 книги и повеќе од 270 одделни прилози (колумни, осврти, прегледи). Работела и како предавач на првата “Школа за род и политика” во Македонија, при Институтот Евро Балкан, Скопје, од 2002 до 2006 г., со предметот: „Родот во литературната теорија“. Учествувала на меѓународната конференција „Род и наука“, во организација на Филозофскиот факултет во Сараево, во 2008 год. Во својство на визитинг професор, предавала на пост-дипломските студии „Феминизмот во транс-национална перспектива“, при Интер-универзитетскиот центар во Дубровник (Хрватска). Редовно настапувала на собири, во организација на Центарот за женски студии во Белград и соработувала со реномираните феминистички списанија “Pro Femina” и “Genero”, каде ги објавила своите прилози “Негативна утопија дома” и “Langhueur d’ amour: типолошка веза донжуанизма и нихилизма”. Ја превела, на македонски јазик, темелната книга од областа на родовите студии „Неволји со родот (Gender Trouble)“ од Џудит Батлер (Евро Балкан Прес, Скопје, 2002 год).
Емилија Петреска-Камењарова е магистерка по комуникации и дипломирана новинарка. Пред да почне да работи во Агенцијата за аудио и аудиовизуелни медиумски, во 2002 година, работела како новинарка на радио, телевизија и во новинска агенција. Во моментов е раководителка на Одделението за човекови права и медиумска писменост во Агенцијата. Работи на прашања какви што се родот во медиумите, слободата на изразување и говорот на омраза, човековите права и професионалните стандарди, пристап до медиумите за лицата со сетилна попреченост, медиумска писменост, избори итн.
Има објавено повеќе дела и текстови за родот во медиумите, говорот на омраза, позицијата на медиумите во Република Северна Македонија, граѓанско новинарство. Држела обуки и работилници и била панелистка на следниве теми: медиумите и родот/женското тело, родови малцински групи, говор на омраза, право на приватност, медиумска писменост, клиентелизам во медиумите.
Кумјана Новакова работи на полето на креативниот документарен филм и аудиовизуелните уметности од 2006 год. Таа е ко-основачка на филмскиот фестивал Право Људски (Pravo Ljudski) во Сараево (2006), а го водеше и одделот за филм и видео на Музејот на современата уметност – Скопје (2018-2021). Има долгогодишно искуство во истражувањето, изложувањето и објавувањето во врска со филмот како медиум. Курирала филмска програма за многубројни филмски фестивали и филмски платформи како DOK Leipzig – Germany, États généraux du film documentaire de Lussas – France, Play-DOC, Tui – Spain, Rencontres Cinématographiques, Cusy – France, Culturescapes, Basel – Switzerland, Filmske mutacije – festival nevidljivog filma Zagreb, Прво па женско, Скопје, итн. Кумјана е вонредна професорка на одделот за документаристика и не-фикција на Универзитетот за аудиовизуелни уметности ЕСКАК (ESCAC) во Барселона, како и на магистерските студии за филм на Холандската филмска академија во Амстердам (International Master’s Degree Programme -MA- Artistic Research in and through Film at the Netherlands Film Academy in Amsterdam). Предавала креативен документарен филм и на студиите за филм “film.factory” основани и водени од Бела Тар во Сараево при Сараевската филмска академија (Sarajevo Film Academy).
